A valoración das solicitudes do PEL-Reactiva atendeu a criterios puramente técnicos
Continúa avanzando o procedemento de concesión das axudas do fondo de financiamento para a reactivación económica e social PEL-Reactiva. Dito programa está impulsado pola Deputación da Coruña ao que se adheriu o Concello da Laracha. O propósito é contribuír a paliar as consecuencias econonómicas que a crise do coronavirus supuxo para as microempresas e persoas autónomas. A tramitación administrativa está a ser ardua debido tanto á cantidade de solicitudes presentadas. Por isto, o prazo de resolución definitiva das achegas foi ampliado ata o 12 de abril.
Hoxe está previsto publicar na web municipal www.alaracha.gal as relacións provisionais tanto de beneficiarios como das solicitudes desestimadas por excederse a contía máxima de financiamento dispoñible ou por non cumprir algún dos requisitos do programa. O procedemento de concesión é por concorrencia competitiva e a valoración das solicitudes de cada candidato realizouse segundo os criterios puramente técnicos fixados nas bases aprobadas pola Deputación da Coruña.
Unha vez publicadas estas listaxes provisionais, os solicitantes do PEL-Reactiva terán un prazo de dez días para subsanar deficiencias ou presentar as reclamacións que estimen oportunas. A continuación publicaranse as listaxes definitivas, abríndose o prazo para que os beneficiarios presenten a documentación requirida de xustificación das axudas. Por último, procederase ao pagamento. Este fondo de financiamento da Deputación da Coruña e do Concello da Laracha está dotado con 148.500 euros. Cada beneficiario percibirá unha achega dun mínimo de 1.500 euros e un máximo de 3.000 euros.
