Como é tradicional antes do inicio de cada Pleno ordinario, gardouse un minuto de silencio polas 41 mulleres asasinadas en España no que vai de ano
Hoxe celebrouse o Pleno ordinario correspondente ao mes de novembro e a sesión comezou coa lectura dun manifesto de rexeitamento da violencia de xénero. Fíxose como un dos actos municipais en conmemoración do 25 de novembro. Nese sentido, e tal e como é tradicional antes do inicio de cada Pleno ordinario, gardouse un minuto de silencio polas 41 mulleres asasinadas en España no que vai de ano.
O Pleno aprobou de xeito unánime o Plan de acción municipal no que se detallan as iniciativas a levar a cabo nos próximos anos para acadar os obxectivos do Pacto das Alcaldías para o clima e a enerxía que impulsa a Unión Europea e ao que está adherido o Concello da Laracha.
O documento presenta dúas partes diferenciadas. Por un lado está o Plan de Acción para a enerxía sostible, que ten como obxectivo a descarbonización do territorio municipal. Reducindo así, as emisións de gases de efecto invernadoiro nun 40% para o ano 2030. As iniciativas están centradas no fomento das enerxías renovables y a mobilidade sostible. Tamén, no aumento da eficiencia enerxética en edificios, instalacións e equipamentos públicos e a información e concienciación dos empregados públicos e da cidadanía en xeral.
A segunda parte do plan refírese á adaptación ao cambio climático e foi definida a partir dunha avaliación de riscos, vulnerabilidades e fortalezas. Prográmanse así, unha serie de accións que farán da Laracha un municipio menos vulnerable no futuro. Ademáis, aborda o reto de dar unha axeitada resposta á pobreza enerxética, con tres accións previstas centradas na organización interna municipal, comunicación e participación, e concienciación e sensibilización.
Abstencións do Psoe e Bng
O outro acordo alcanzado no Pleno -neste caso, coas abstencións dos grupos do PSOE e do BNG- foi a aprobación da Conta Xeral do exercicio económico 2019. O alcalde explicou que esta cuestión se elevou ao Pleno “unha vez rematado o período de exposición pública, sen terse presentado ningunha alegación e contando con todos os informes favorables”.
Así, o orzamento do ano pasado péchase en 10.340.781,41 euros no capítulo de ingresos e de 9.638.053,33 euros no de gastos. O remanente de tesourería ao peche do exercicio económico 2019 situouse nos 3.273.596,95 euros. Gran parte desa cantidade foi incorporada aos orzamentos deste ano para o financiamento de investimentos en infraestruturas municipais e plans de axudas ao tecido comercial para paliar os efectos da crise do coronavirus. José Manuel López Varela concluíu afirmando que a Conta Xeral “recolle a saneada situación económica do Concello”.
