María Palomi Rodríguez, voceira do grupo socialista da Laracha leva ao pleno cuestións de interés dos veciños
1- Primerira moción no pleno. Elaboración dun regulamento específico de participación cidadá. Que se elabore un Regulamento específico de participación cidadá en diálogo co tecido asociativo e veciñal do municipio que inclúa a elaboración dos orzamentos de maneira participativa. «Hai que buscar a participación cidadán en temas orzamentarios ou nas inversións. A nosa proposta trata de garantir e posibilitar que a veciñanza sexan partícipes nas decisións que se toman dende o Concello e lles afectan directamente en materia de inversións, políticas educativas, sanitarias, medioambientais, e demais», explica o Psoe.
2- Gravacións das sesións plenarias por streaming. «Somos conscientes da necesidade de adaptar a xestión municipal ás novas tecnoloxías, ás esixencias que establece a Lei de transparencia e ao restante marco legal no relativo ao acceso electrónico da veciñanza aos servizos públicos. O sistema de gravación audiovisual das sesións de Pleno que se celebran no Concello, a súa retransmisión en directo vía streaming fará que todas as nosas veciñas e veciños teñan a información de primeira man», afirman Por iso solicitan:
- a.- Desenvolver os mecanismos necesarios para a emisión en directo dos plenos da Corporación para que sexan accesibles á toda a veciñanza.
- b.- Crear, na páxina web municipal, unha hemeroteca na que queden arquivadas as gravacións íntegras de todas as sesións para que poidan ser consultadas pola veciñas ou veciños en calquera momento.
3- Recuperación da Atención Primaria presencial. Para isto o Pleno do Concello de A Laracha insta a Xunta de Galicia a:
- a. Iniciar a recuperación da Atención Primaria presencial para poder ofrecer a mellor calidade asistencial posible.
- b. Abrir un proceso de recuperación dos profesionais perdidos nos últimos anos, con especial atención á Atención Primaria garantindo a cobertura e substitucións dos profesionais dos centros de saúde para non afastar a asistencia da cidadanía.
Preguntas ao pleno
Así mesmo, Pilar Neira Martínez e María Palomi Rodríguez Castiñeira, concelleiras pertencentes ao Grupo Municipal Socialista do Concello da Laracha preguntarán:
- 1- Están ultimados os protocolos de seguridade para a utilización por parte das persoas usuarias (federadas e non federadas) das instalacións deportivas na Laracha, para garantir a utilización dos diferentes espazos deportivos con todas as medidas de seguridade recomendadas polas autoridades sanitarias?
- 2-Os protocolos do Concello axústanse aos que marca a Secretaría Xeral para o Deporte, ou os que marcan as federacións deportivas?
- 3- Ten previsto realizar algún plan de promoción da práctica deportiva ou algún tipo de actuación para fomentar o deporte?
- 4- O Grupo Municipal Socialista considera que o parque empresarial/industrial de A Laracha ten unha importancia transcendental no desenvolvemento socioeconómico do noso pobo e que abre un espazo de crecemento económico e de emprego. Ofrecemos o noso apoio para impulsar esa ampliación e por iso formulamos as seguintes preguntas: Ofreceuse chan municipal para a ampliación do polígono? En caso positivo, que chan se ten ofrecido? En que fase se atopan as actuacións para esa ampliación?
