Tras este trámite, as obras da pista comenzarán nos próximos días
Trátase da execución do proxecto de creación dunha nova pista polideportiva descuberta xunto ao IES Agra de Leborís. A obra está valorada en 98.000 euros. O alcalde da Laracha, José Manuel López Varela, e o representante da empresa Construcciones SYR-AMG formalizaron hoxe o contrato.
Terá unhas dimensións de 42×25 metros máis dous metros de seguridade. Alí se marcarán lonxitudinalmente unha pista de fútbol sala de medidas regulamentarias e, transversalmente, dúas pistas de baloncesto. Contará con iluminación con báculos e un valado perimetral de malla.
Esta nova infraestrutura crearase a carón da outra pista polideportiva descuberta de recente creación. Ambas son complementarias entre si ao presentar unhas características distintas e estar equipadas para adaptar o seu uso aos diferentes grupos de idade. As obras comezarán nos próximos días.
Aberto o acollemento no vivero de empresas
O Concello da Laracha lembra que continúa aberto o programa de acollemento no viveiro de empresas municipal do polígono industrial. As persoas interesadas deben presentar a súa instancia debidamente cuberta e acompañada da memoria que describa o proxecto. O aluguer das naves terá unha cota mensual de 300 euros e o das oficinas, de 60 euros. En ambos casos incluirán servizo. A estadía máxima é de doce meses prorrogables por outros seis máis.
Os criterios que se terán serán a viabilidade da iniciativa, o número de empregos previstos, os medios financeiros e materiais, a formación dos solicitantes e o carácter innovador e tecnolóxico do proxecto.
Os requisitos que deben cumprir as empresas son ter o domicilio social e fiscal no Concello da Laracha, estar constituídas como máximo seis meses antes de presentar a solicitude ou tres meses despois da resolución da concesión do acollemento. Tamén, presentar o proxecto que avale a viabilidade económica e técnica da iniciativa empresarial. O contido do programa de acollemento de empresas no parque empresarial da Laracha pode consultarse ao completo na web municipal www.alaracha.gal.
