Unha das propostas é sacarse unha fotografía xunto ao globo de cómic coa frase que considere mellor representa o seu sentimento de rexeitamento á violencia de xénero
O 25 de novembro conmemórase o Día internacional contra a violencia de xénero. En torno a esa data, o Concello da Laracha desenvolve todos os anos unha programación específica sobre esta temática. Complementa iniciativas, actos e servizos que están á disposición da cidadanía para loitar contra esa lacra social, apoiar ás vítimas e mostrar tolerancia cero cos maltratadores.
Baixo o lema Eu implícome contra a violencia de xénero, onte presentouse a campaña municipal que xa está en marcha adaptada ás circunstancias actuais. Permite a participación cidadá tanto de xeito individualizado como familiar. Tamén é fundamental a implicación do tecido comercial local.
O alcalde José Manuel López Varela, a concelleira de Igualdade, Rocío López, a directora do CIM da Laracha, Ana Aldao, e persoal municipal posaron na Praza do Concello cos carteis que se distribuirán por moi diversos puntos do municipio.
Eu implícome contra a violencia de xénero
A campaña consta de tres partes complementarias entre si:
- O proxecto Xanelas. Consiste na distribución de carteis en formato globo con frases inspiradoras e potentes contra a violencia de xénero. Son para colocar nas fachadas exteriores dos locais comerciais e das vivendas particulares que o soliciten. As persoas ou empresas que desexen participar deben cubrir o formulario, dispoñible na web municipal, e recibirán o seu cartel de xeito gratuíto.
- O proxecto Selfie. É unha iniciativa que se levará a cabo a continuación. Consiste nun concurso no que as persoas que desexen deben sacarse unha fotografía xunto ao globo de cómic coa frase que considere mellor representa o seu sentimento de rexeitamento á violencia de xénero. Enviala ao Concello vía correo electrónico para ser publicada no Instagram @Xuventudealaracha. As tres imaxes que obteñan máis “gústame” entre o 23 e o 30 de novembro serán premiadas cunha tableta, un reloxo intelixente e un altofalante portátil. Con esto preténdese a divulgación viral da campaña de concienciación especialmente entre os colectivo dos mozos, acostumados a comunicar a súas ideas e pensamentos nas redes sociais.
- A terceira das iniciativas de Eu implícome contra a violencia de xénero consiste na distribución de bolsas e de máscaras de cor violeta. Levan gravado sobre un lazo o lema “Eu implícome” e o escudo do Concello da Laracha.
Obra de teatro
O programa municipal en torno ao 25 de novembro tamén inclúe unha función dentro dos Venres Teatrais relacionada coa temática da violencia de xénero. Será o 4 de decembro con Soa, espectáculo protagonizado por unha muller maltratada física e psicoloxicamente á que dá vida a actriz Rogelia dos Outeiros. A peza está dirixida por Fran Rei e inspirada no monólogo de Darío Fo La donna sola. Neste caso o Concello conta coa colaboración da Secretaría Xeral de Política Lingüística da Xunta de Galicia dentro do programa FalaRedes e do Fondo de proxectos culturais Xacobeo 2021.
Adhesión ao proxecto «A Costa das Mulleres«
O Concello da Laracha está adherido ao proxecto audiovisual do Grupo de Desenvolvemento Rural (GDR) Costa da Morte. Leva por título A Costa das Mulleres, e ten por finalidade amosar o rol das mulleres, súas vidas e das historias das referentes locais e comarcais. Inclúe unha serie de iniciativas, como a creación da marca propia Na Costa da Morte, rompemos o silencio e a gravación de microvídeos con temática da muller rural. Tamén, a produción dun documental e a creación de xogos interactivos con recoñecemento da violencia de xénero e o ciberacoso.
