A Laracha acollerá o vindeiro día 16 de setembro a novidosa iniciativa Xogade coas motos.
A Laracha acollerá o vindeiro día 16 de setembro a novidosa iniciativa Xogade coas motos, dirixida a nenos e adolescentes (de 6 a 16 anos de idade) e na que se lles ofrecerá a posibilidade de probar unha moto de velocidade e iniciarse nesta disciplina deportiva.
O evento é organizado por VF Timing co apoio do Concello, a Federación Galega de Motociclismo e a Secretaría Xeral para o Deporte da Xunta de Galicia a través do Programa Xogade (Xogos Galegos Deportivos en Idade Escolar). A Laracha é o único municipio da provincia da Coruña incluído no calendario desta iniciativa.
O alcalde, José Manuel López Varela, e a edil de Deportes, Patricia Bello, recibiron no Concello a Sandra Fernández, responsable de VF Timing, e ao colaborador Daniel Remuiñán para tratar diversas cuestións relacionadas co evento.
Xogade coas motos pretende fomentar o motociclismo de base facilitando o acceso dos máis pequenos ás motos de velocidade. A actividade non será competitiva, xa que a finalidade esencial é coñecer se aos rapaces lles gusta o deporte do motociclismo. Os participantes terán acceso gratuíto ás motos, monos e cascos para realizar distintos exercicios de habilidade que serán dirixidos por monitores, encargados tamén de valorar o nivel do neno e de ofrecerlle esa información aos pais.
Trátase dunha primeira toma de contacto que permite que os rapaces con inquedanzas polo motociclismo poidan coñecer e achegarse a este deporte sen necesidade dun investimento inicial e, de ser o caso, recibir asesoramento para a súa práctica habitual nas diferentes opcións dispoñibles en Galicia (escolas, circuítos, competicións, etc).
En próximas datas farase a presentación oficial da actividade e anunciaranse as datas de inscrición, na que terán prioridade os empradoados no termo municipal da Laracha.
