O Concello presentará un proxecto ao Instituto Enerxético de Galicia (Inega) ao abeiro da convocatoria de subvencións para programas vinculados ao autoconsumo eléctrico.
O Concello presentará un proxecto ao Instituto Enerxético de Galicia (Inega) ao abeiro da convocatoria de subvencións para programas vinculados ao autoconsumo eléctrico e ao almacenamento no sector das administracións públicas no marco do Plan de Recuperación, Transformación e Resiliencia Europeo.
A iniciativa impulsada desde o Concello consiste na instalación dun sistema de produción de enerxía fotovoltaica compostos por un total de 180 paneis e unha potencia total de 99 Kw coa que se pretende abastecer varios edificios municipais na modalidade de autoconsumo colectivo con compensación de excedentes.
Dita instalación faríase sobre a cuberta do pavillón polideportivo Municipal da Laracha, considerando ese espazo idóneo porque permite aproveitar a pendente existente e pola orientación sur, así como por minimizar o impacto visual dos paneis.
Este sistema fotovoltaico considérase especialmente favorable para a configuración dos consumos dos edificios municipais, concentrado nas horas centrais do día coincidindo coa franxa de maior produción eléctrica. En concreto, as instalacións que se contempla abastecer son a Casa do Concello, o edificio de servizos múltiples, o edificio administrativo, a biblioteca da Laracha, a escola infantil “A Galiña Azul”, o xulgado de paz, a Casa da Cultura e o complexo deportivo da piscina municipal.
Segundo os estudos realizados polo Concello, o autoconsumo con respecto á enerxía consumida actualmente sería do 56,7 %, o que implicaría tanto a redución de máis da metade das emisións de CO2 como da factura eléctrica nas citadas instalacións.
O orzamento do proxecto redactado polo Concello supera os 125.000 euros.
