Concluíron as obras da segunda fase da mellora dos elementos de protección do paseo marítimo de Caión.
Concluíron as obras da segunda fase da mellora dos elementos de protección do paseo marítimo de Caión e o espazo peonil volveu a abrirse para o seu uso e desfrute por parte da cidadanía.
Esta intervención afectou a un tramo de 180 metros da balaustrada de madeira desde o acceso á praia do Caracoleiro en dirección á entrada principal á praia das Salseiras.
As obras deron continuidade, por presentar características idénticas, á primeira fase executada a principios de ano nunha actuación que fora posta de exemplo polo Centro de Innovación e Servizos Tecnolóxicos da Madeira de Galicia (CIS Madeira) polo seu deseño integrador e o emprego da madeira de castaño como material de construción sostible e esteticamente axeitado á contorna do paseo marítimo.
O Concello e Turismo de Galicia -no marco da liña de axudas para actuacións de embelecemento do litoral galego do Plan de recuperación, transformación e resiliencia, financiado pola Unión Europea-Next Generation- investiron 85.000 euros nesta segunda fase do proxecto dirixido a aumentar a seguridade no paseo marítimo e revitalizalo como destino turístico.
