As obras de mellora do pavimento do Sendeiro de Saldoiro de Caión xa están en execución.
As obras de mellora do pavimento do Sendeiro de Saldoiro de Caión xa están en execución. O proxecto afecta ao último tramo construído do paseo marítimo e consiste na restauración do firme nas zonas que presentan un maior deterioro debido ao paso do tempo.
A actuación respectará e conservará as características construtivas e formais do sendeiro. De feito, os materiais antigos son reutilizados mediante un proceso mecánico consistente no fresado e o triturado para, a continuación, volver estendelo sobre o pavimento, compactándoo e engadindo unha pequena porcentaxe de cal para estabilizar a superficie.
Tamén se está a realizar a completa limpeza e eliminación da vexetación, e van ser renovados os bordos de madeira precisamente cos obxectivos de conter o crecemento da herba cara o espazo de tránsito peonil e de embelecer a infraestrutura. Ademais, será reparada e consolidada a varanda de madeira existente que protexe aos sendeiristas ante o desnivel que presenta ese tramo.
O alcalde, José Manuel López Varela, e o concelleiro responsable da área de Obras Públicas, Pablo Cambón, desprazáronse ata Caión para manter un encontro cos operarios no propio lugar dos traballos e coñecer o resultado das primeiras intervencións que se van prolongar durante os próximos días.
O orzamento supera os 28.000 euros a cofinanciar entre o Concello e a Xunta de Galicia ao abeiro da convocatoria de axudas para estudos e investimentos vinculados á conservación, recuperación e rehabilitación do patrimonio natural e cultural e á sensibilización ecolóxica na Rede Natura 2000.
