Estanse a realizar as actuacións oportunas de mellora e posta a punto das instalacións da escola infantil da Laracha de cara ao inicio do curso 2023-2024.
No mes de setembro comezará a actividade na escola infantil da Laracha, incluída na rede pública A Galiña Azul. O Concello e o Consorcio Galego de Servizos de Igualdade e Benestar están a realizar as actuacións oportunas de mellora e posta a punto das instalacións de cara ao inicio do curso 2023-2024.
As obras que están en fase de execución consisten na substitución do solo nas zonas do interior da escola que así o requirían como son o corredor, o comedor e a aula de bebés ao tratarse dos espazos que presentaban un maior deterioro polo uso durante os últimos anos. O alcalde, José Manuel López Varela, e a concelleira de Servizos Sociais, Rocío López, realizaron unha visita para coñecer o resultado dos traballos, que supoñen un investimento aproximado de 15.000 euros.
Cabe lembrar que a escola infantil da Laracha conta cun total de 115 prazas. Actualmente está aberto o prazo de solicitude de prazas no segundo período de admisión. As persoas interesadas poden realizar os trámites en liña na páxina web do Consorcio Galego de Servizos de Igualdade e Benestar (www.igualdadebenestar.org/).
