O Concello denunciará ante garda civil e seprona o vertido de lixo detectado no Castro de Montes Claros.
O Concello solicita a colaboración cidadá para tratar de dar cos responsables do verquido incontrolado de lixo que foi detectado este sábado no Castro de Montes Claros e que estaba composto, principalmente, por neveiras e conxeladores.
A Policía Local abriu uha investigación ao respecto e elaborou o correspondente informe. Denunciarase o sucedido ante a Garda Civil e o Seprona. O material xa foi retirado por operarios municipais á maior brevidade trala detección do vertido para evitar posibles danos medioambientais na zona.
Desde o Concello laméntase a actitude incívica e insolidaria dos responsables deste acto, especialmente grave ao afectar a un espazo de alto valor patrimonial como é o Castro de Montes Claros e, ademais, por tratarse dun tipo de material que pode depositarse de xeito gratuíto no punto limpo da Laracha, o que garantiría o seu correcto tratamento.
