O programa, que inclúe orquestras de referencia, día do neno e outras propostas culturais e deportivas, foi presentado polo alcalde e o presidente da Comisión de Festas
José Manuel López Varela, alcalda do concello, a concelleira delegada da área de Festas, Patricia Bello, e o presidente da Comisión de Festas da Laracha presentaron a programación que se desenvolverá do 14 ao 17 de agosto con motivo da celebración das Festas Patronais da capital municipal.
A celebración conta con orquestras de primeiro nivel e tamén con propostas culturais, deportivas, lúdicas e recreativas para o desfrute de todos os públicos. Ademáis, haberá dous escenarios principais nos que se desenvolverán os eventos:
- Praza do Concello para as sesións vermú
- Praza Olonne sur Mer, para a maior parte das actividades das tardes e tamén as verbenas nocturnas
Calendario e actividades
As festas comezarán o domingo 14 pola tarde co concerto infantil Uxía Lambona e a Banda Molona a cargo de Astronauta Sideral, ás 19:00 horas na Praza do Concello. Pola noite a verbena será amenizada pola orquestra Finisterre. Pode verse o cartel completo na imaxe de abaixo
Luns 15, o día grande das Festas, o pasacalles será a cargo da banda de gaitas Os Viqueiras de Ordes. Pola tarde, desde as 18:00 horas, celebrarase unha nova edición do trofeo de fútbol “Concello da Laracha” no campo Municipal. Como é tradicional, será en formato triangular e participarán o Laracha CF, a UD Paiosaco e o Club do Mar de Caión, servindo tamén o torneo como preparación na pretemporada dos tres conxuntos. Ás 20:00 horas a Asociación Cultural Santa María de Torás ofrecerá unha actuación no Praza Olonne sur Mer. Pecharase a xornada coa verbena a cargo da orquestra Compostela.
Martes 16 o pasacalles do mediodía será coa Agrupación Musical Nuestra Señora del Nordés. Ás 13:00 horas sairá a procesión desde a igrexa parroquial ata a capela de San Roque e San Antonio, onde se oficiará unha misa solemne. Pola tarde, ás 19:00 horas Somos Circo realizará o seu espectáculo de acrobacia aérea Desastronauts. E a xornada rematará co prato forte do cartel, a verbena coa orquestra Panorama.
Mércores 17 a Asociación Cultural Queiroga de Paiosaco encargarase do pasacalles. Pola tarde, desde as 17:00 horas, a Praza Olonne sur Mer acollerá o Día do Neno con diversidade de xogos para os máis pequenos. E á noite porase o punto e final ás festas cunha verbena a cargo da orquestra Fania Blanco Show. No descanso haberá un espectáculo de fogos artificiais.
«Programación de alto nivel»
O alcalde aproveitou a ocasión para agradecer o traballo da Comisión de Festas que, coa colaboración do Concello, fai posible “contar cunha programación de alto nivel e moi variada para que todos poidamos celebrar os días grandes da capital municipal”.
Tamén o presidente da Comisión de Festas agradeceu o apoio que están a recibir tanto polo Concello como polos veciños da parroquia de Torás, locais de hostalería, establecementos comerciais e empresas colaboradoras. Ambos concluíron animando á cidadanía a acudir e desfrutar dos eventos durante esas catro xornadas de festa.
