A Laracha acolle o venres da próxima semana, día 10 de maio, o espectáculo A Maxia de Europa.
A Laracha acolle o venres da próxima semana, día 10 de maio, o espectáculo A Maxia de Europa. Trátase dunha actividade de EUROPE DIRECT A Coruña que mestura xogos, trucos, ilusións e humor para realizar unha viaxe máxica e dinámica para todos os públicos, maiores e pequenos, a través dos valores, símbolos, beneficios e algún dos programas da Unión Europea. A función, con entrada de balde, terá lugar na Casa da Cultura ás 18:00 horas.
O público asistente poderá seguir os trucos de maxia realizados coas bandeiras europea e dos estados membro ou a moeda común, entre outros elementos. O espectáculo estará guiado polo mago Pedro Bugarín, un ilusionista con máis de 15 anos de experiencia no seu eido e que tamén ten vivido múltiples experiencias de mobilidade en Europa.
Esta actividade lúdica e máxica está organizada por EUROPE DIRECT A Coruña dentro da iniciativa Europa no teu Concello, da que forma parte o Concello da Laracha. O espectáculo levará durante o mes de maio os valores, símbolos e oportunidades da Unión Europea a un total de seis municipios da provincia adheridos a esta rede.
Toda a información dispoñible está recollida na páxina: http://www.dacoruna.gal/europedirect/europe-direct-coruna/agenda/2024/la-magia-de-europa
Europa no teu Concello
Este espectáculo itinerante forma parte da programación que Europa no teu Concello ofrece aos membros da rede. EUROPE DIRECT A Coruña puxo en marcha esta iniciativa, da que xa forman parte 46 concellos, para aproximar a información sobre a Unión Europea a toda a cidadanía da provincia, en especial, da mocidade.
EUROPE DIRECT A Coruña é un centro de información oficial da Comisión Europea que pertence á Deputación da Coruña. A misión do centro, que iniciou a súa traxectoria no ano 1996, é traballar coa cidadanía, os medios de comunicación e as entidades locais cos obxectivos de implicar á poboación en temas europeos, así como proporcionar contidos sobre as políticas e as prioridades da UE. Tamén axudar á Comisión Europea a adquirir unha visión xeral das sensibilidades locais relacionadas coas súas políticas e promover a cidadanía europea activa nas escolas.
Para información complementaria, pódese contactar a través do correo electrónico europedirect@dacoruna.gal, ou ben, no número de teléfono 981 080 331.
