A firma galega Unifersa é referente nacional na distribución de material de ferraxaría
Unifersa, empresa de referencia nacional na distribución de material de ferraxaría, colocou a primeira pedra do que serán as súas futuras instalacións no parque empresarial da Laracha. Con este acto simbolizouse o inicio dunhas obras que se prolongarán durante o próximo ano e medio. Se levarán a cabo na parcela de 42.000 metros cadrados de superficie adquirida pola firma galega.
Ante o vicepresidente segundo e Conselleiro de Economía, Empresa e Innovación, Francisco Conde, e o director xeral –Jesús Vieito-, o presidente –Luis Astray-, membros do consello de administración, xunta directiva e socios de Unifersa, o alcalde agradeceu á empresa a súa “aposta pola Laracha”. Para José Manuel López Varela “é un día histórico para este Concello” no que “non só se colocou a primeira pedra do proxecto. Tamén se colocaron moitas pedras para fortalecer e continuar consolidando o tecido empresarial, xerar actividade económica na comarca de Bergantiños, o xurdimento de novas posibilidades de negocio, a creación de postos de traballo directos e indirectos e para fixar poboación na Laracha.
O rexedor local tamén destacou as oportunidades que ofrece o parque empresarial, que aspira a que se converta nunha “plataforma loxística de referencia no noroeste de España dentro do eixo industrial A Laracha–Arteixo–Carballo”. Por iso referiuse á “importancia do que podemos alcanzar cando todas as administracións implicadas traballan xuntas cun mesmo propósito” en alusión á futura ampliación do polígono que está actualmente en trámite.
