Dous socorristas incorporaríanse ao abeiro da convocatoria de axudas da Xunta de Galicia para o fomento do emprego
O Concello da Laracha reforzará o servizo de socorristas e coordinación na praia de Caión ao longo da temporada de verán que comezará en xuño. O propósito do goberno municipal é dispoñer dun total de dez efectivos (nove socorristas e un coordinador). Trátase dun máis que no ano pasado, realizándose as contratacións por dúas vías diferentes.
Por un lado o Concello licitou a finais de abril a contratación do servizo á que, tras rematarse o prazo de presentación de ofertas, optan dúas empresas. Nos próximos días reunirase a Mesa de Contratación para clasificar as propostas atendendo aos criterios de valoración establecidos nos pregos. A adxudicataria deberá dotar á praia con sete socorristas –canda menos un deles debe contar coa titulación de patrón de embarcación-. Tamén a un coordinador xeral para servizos de socorrismo, salvamento, vixilancia e primeiros auxilios. A contratación é para a praia de Caión do 15 de xuño ao 15 de setembro, todos os días entre as 12:00 e as 20:00 horas. O orzamento base de licitación ascende a 58.267,09 euros. Esta contratación será financiada integramente con fondos municipais.
Por outra banda, o Concello ten solicitada axudas da Consellería de Emprego e Igualdade da Xunta de Galicia para o fomento do emprego e a mellora da empregabilidade. A finalidade é contratar socorristas para a temporada de verán en Caión. Dita liña de subvencións está pendente de resolución. No caso de que sexa favorable, o Concello iniciaría o correspondente procedemento de selección de persoal para reforzar o servizo con dous efectivos máis.
