Nove empresas optan á adxudicación dos contratos do servizo de desbroce na Laracha

O servizo inclúe 300 km de estradas, 100 km de camiños forestais e 200.000 m² de terreos

Unha vez finalizado o prazo de presentación de ofertas na licitación do servizo de roza e desbroce de cunetas de estradas e parcelas de titularidade municipal, son nove as empresas que optan a resultar adxudicatarias. Trátase dalgún dos cinco lotes no que foi dividido o contrato co propósito de axilizar a execución das actuacións.

Esta campaña de desbroce ten por obxectivo eliminar a vexetación herbácea nas marxes das estradas para frear o seu crecemento e mellorar a visibilidade dos condutores e viandantes. Tamén, para reforzar a seguridade viaria, ademais de previr riscos de incendio e manter o ornato público na rede viaria.

O Concello da Laracha destinará 140.000 euros procedentes integramente de fondos municipais para eses traballos durante o remate da primavera, o verán e no inicio do outono. Falamos de máis de 300 quilómetros de estradas municipais, máis de 100 quilómetros de pistas forestais e preto de 200 mil metros cadrados de parcelas e terreos municipais. Éstes non están incluídos no contrato do servizo de limpeza e mantemento de zonas verdes. Tal e como se estipula nas cláusulas, en determinadas vías será preciso realizar dúas cortas durante a campaña.

En concreto, os lotes nos que está dividido o contrato son os seguintes:

• Lote 1. Estradas municipais das parroquias de Cabovilaño, Caión, Lemaio, Lendo, Torás e Vilaño: 37.645,76 euros.
• Lote 2. Estradas municipais das parroquias de Coiro, Erboedo e Soandres: 29.731,84 euros.
• Lote 3. Estradas municipais das parroquias de Lestón, Golmar, Montemaior e Soutullo: 30.664,32 euros.
• Lote 4. Camiños forestais de todo o termo municipal: 27.313,74 euros.
• Lote 5. Parcelas e terreos de titularidade municipal: 14.524,02 euros.