A Xunta de Goberno da Laracha formalizou a adhesión ao programa coa Deputación da Coruña
Crearase un fondo de financiamento para a reactivación económica e social que beneficiará a autónomos e empresas afectadas pola Covid-19. Concello e Deputación da Coruña achegarán máis de 185.000 euros. Sumados ao plan municipal promovido no verán e dotado con 220.000 euros, na Laracha destinaranse a ese fin máis de 400.000 euros.
Na sesión ordinaria da Xunta de Goberno Local acordou a adhesión do Concello ao fondo de financiamento para a reactivación económica e social da provincia da Coruña, PEL-Reactiva, impulsado pola Deputación.
Xeración de emprego
Este programa de axudas irá dirixido a mitigar os efectos negativos que están a sufrir persoas autónomas e microempresas debido á crise. As subvencións terán por finalidade cooperar na viabilidade económica da súa actividade. Deste xeito, contribuirá na xeración de emprego no termo municipal. A Laracha contará cunha partida orzamentaria de 185.113,21 euros para esta liña de subvencións. O Concello asumirá con fondos propios municipais o vinte por cento equivalente a 37.022, 64 euros.
Ademais deste programa, o Concello promoveu durante o verán un plan municipal de subvencións para o fomento do emprego. Impulsó a actividade económica das empresas e autónomos afectados pola pandemia con 220.000 euros. Solicitaron acollerse 214 autónomos e microempresas. Entre ambas iniciativas, no Concello da Laracha destinaranse máis de 400.000 euros en subvencións directas ao tecido empresarial local. Salientar, por outra banda, que na Xunta de Goberno Local tamén se concedeu a licenza de primeira ocupación para unha vivenda unifamiliar na parroquia de Montemaior.
