Un dos proxectos afecta á rúa Silverio Moreda da Laracha, na que se establecerá o sentido único de circulación
Na sesión ordinaria da Xunta de Goberno Local celebrada hoxe foron adxudicados dous proxectos de mellora da rede viaria municipal que suporán un investimento total de 159.500 euros. Un deles consiste na mellora da seguridade viaria da rúa Silverio Moreda Alvariño da capital municipal. Actualmente está permitido o dobre sentido de circulación e existen tanto beirarrúas como zonas de aparcamento a ambas marxes.
O Concello, consciente das dificultades que iso implica para o tránsito de vehículos, establecerá o sentido único. Será con acceso pola Avenida Fisterra (estrada AC-552) e saída pola Avenida de Caión (estrada DP-1913), xunto á igrexa parroquial de Santa María de Torás. Isto posibilitará conservar todas as prazas de estacionamento a ambos lados da vía e ampliar as beirarrúas para aumentar a seguridade dos peóns. Ademais, contémplanse melloras na accesibilidade, iluminación pública e a completa sinalización en toda a rúa. A actuación está valorada en 85.500 euros e será executada por Construcciones Vázquez y Reino.
En zonas rurais
O outro proxecto adxudicado pola Xunta de Goberno céntrase na mellora de camiños situados en zonas rurais. Será cofinanciado pola Axencia Galega de Desenvolvemento Rural no marco do Plan de mellora de camiños municipais de acceso a parcelas agrícolas.
Inclúense catro intervencións diferenciadas en estradas municipais. Discorren por A Ferreira (parroquias de Montemaior e Soandres) e San Fins de Arriba en dirección á estrada CP-2404 (Montemaior). Tamén, na vía que comunica A Costa e Tuixe de Abaixo (parroquias de Cabovilaño e Lemaio) e unha última actuación que daría continuidade á anterior nun camiño de Tuixe de Abaixo. En todos os casos as obras teñen por finalidade mellorar o firme e a drenaxe das estradas, facilitar a circulación e aumentar a seguridade viaria. A execución do proxecto, valorado en 74.000 euros, será a cargo de SYR-AMG.
