A pista de patinaxe complementará os espazos educativos, deportivos e culturais existentes no entorno
A Mesa de Contratación do Concello da Laracha celebrou unha nova reunión para clasificar as seis ofertas presentadas no proxecto de construción do parque de patinaxe Skatepark. Lembramos que a infraestructura situarase na capital municipal, pola parte posterior do IES Agra de Leborís. Segundo os criterios técnicos establecidos nos pregos, a proposta máis favorable para o Concello é a de Zona de Obras O Rosal S.L.
O Concello investirá 155.000 euros procedentes integramente de fondos propios municipais neste proxecto. A obra ten por finalidade ofrecer unha nova alternativa para o ocio e a práctica deportiva especialmente dirixida ao público adolescente e xuvenil. O Skatepark será creado nunha parcela de titularidade municipal que presenta unha superficie de novecentos metros cadrados. Disporá de diferentes tipos de planos inclinados e costas para ofrecer un amplo abano de posibilidades de movementos, piruetas e acrobacias para as diversas disciplinas. Ademáis, o pavimento será de formigón e as barandillas, de aceiro. A obra inclúe unha fonte de auga potable e iluminación en báculos e proxectores simétricos LED. Para a realización e preciso canalizacións dos servizos de abastecemento e electricidade, ademais da recollida de pluviais para evitar a acumulación de auga de choiva na pista.
Esta nova infraestrutura complementará os espazos educativos, deportivos e culturais existentes no entorno deste lugar, xa que xunto ao Skatepark están o instituto e dúas pistas polideportivas, e nas proximidades atópanse a biblioteca, a Casa da Cultura e o complexo deportivo da piscina municipal.
