As obras facilitarán os accesos cara o CEIP Otero Pedrayo para o transporte escolar, vehículos particulares e peóns
As obras de mellora e reforzamento da seguridade viaria na estrada que comunica Bos Aires con O Pereiro comezarán nos próximos días. O alcalde da Laracha, José Manuel López Varela, e o responsable da empresa Construcciones López Cao xa formalizaron o contrato de execución desta ampla actuación.
A intervención forma parte do Plan especial de equipamentos educativos do CEIP Otero Pedrayo, xa que facilitará os accesos ao colexio de maior entidade do termo municipal. A mellora afecta tanto aos autobuses do transporte escolar como aos vehículos particulares. Tamén, a aquelas persoas que acoden ao centro a pé.
Proxecto
O proxecto contempla a ampliación da plataforma da calzada desde os 4,5 metros actuais ata os 10,60 metros que presentará unha vez finalicen as obras. Nese espazo habilitaranse un carril para cada sentido de circulación, senda peonil diferenciada e separada do ámbito de circulación. Ademáis, contará co espazo de aparcamento nunha das marxes e arcén. En total a superficie afectada é de 8.140 metros cadrados. Así mesmo, se inclúen melloras na rede de pluviais e a correspondente sinalización horizontal e vertical. O proxecto está valorado en máis de 243.000 euros e será financiado integramente con fondos propios municipais.
