A participación na licitación está reservada para centros especiais de emprego e empresas de inserción laboral
O Concello da Laracha saca a licitación nos próximos días os novos contratos de xestión do punto limpo e do servizo de limpeza viaria. É por un período de catro anos: dous prorrogables por outros dous máis. O valor estimado é de 943.799,62 euros máis o imposto de valor engadido (IVE).
Os pregos do procedemento serán publicados na Plataforma de Contratación do Sector Público. Nese momento abrirase o prazo para a presentación de ofertas. A participación está limitada a centros especiais de emprego e empresas de inserción laboral de persoas con diversidade funcional. O propósito é incrementar a competencia e facilitar a participación das pequenas e medianas empresas. Polo tanto, a contratación estará dividida en dous lotes diferenciados. En ambos casos as empresas que resulten concesionarias comprometense a subrogar o persoal actualmente adscrito a eses servizos.
Dous lotes
Así, o lote 1 será o referido ao servizo de limpeza viaria e da praia de Caión. Alcanza un importe de 660.882,52 euros máis IVE. Incluirá tamén o varrido manual nos núcleos urbanos e rurais e baldeo mecánico con auga a presión). Ademáis, a eliminación de herbas no borde da calzada, mantemento de papeleiras, intervencións especiais e limpeza da praia de Caión.
Pola súa parte, o lote 2, valorado en 282.917,10 euros máis IVE, inclúe a xestión das instalacións do punto limpo e servizo de recollida de voluminosos a domicilio. Pero ademáis, a recollida dos colectores de papel-cartón, vidro e roupa. Por primeira vez, súmase a xestión dos novos colectores de aceite de uso doméstico que serán implantados polo Concello.
.
