Un total de 62 empresas optan ao procedemento de contratación de obras no Concello da Laracha
O Concello da Laracha ten en fase de contratación tres proxectos dirixidos a mellorar as infraestruturas viarias e os equipamentos deportivos de uso público. Recentemente, remataron os períodos de presentación de ofertas. Nos próximos días reunirase a Mesa de Contratación para proceder á súa clasificación cono trámite previo á adxudicación dos contratos.
O proxecto no que hai un maior número de aspirantes á adxudicación (31) é a urbanización da prolongación da Avenida Manuel Fraga pola parte posterior do IES Agra de Leborís. Trátase da vía de recente apertura coa que o Concello está a crear unha circunvalación que conectará directamente a estrada A Laracha-A Silva (DP-2404) coa estrada A Laracha–Soandres (DP-1913). Así, mellorándose sensiblemente as comunicacións rodadas ao evitar que os vehículos accedan polo centro do casco urbano da Laracha. Tamén permitirá habilitar un novo acceso cara o instituto para os autobuses de transporte escolar, reforzándose así a seguridade para os seus usuarios.
As actuacións alcanzan preto de 245.000 euros. Inclúen a pavimentación da calzada, construción de beirarrúas, espazo de aparcamento, axardinamento, creación das redes de saneamento e abastecemento. Tamén, canalización soterrada dos servizos de rede eléctrica, telecomunicacións e iluminación pública e sinalización horizontal e vertical. Está contemplada, entre outras medidas, un paso de peóns elevado. Cóntase co financiamento da Deputación da Coruña.
Pista deportiva e mellora en Montemaior
Xunto a esta nova vía, tamén a carón do Instituto, será creada unha nova pista polideportiva descuberta de uso libre que complementará a construída nese mesmo lugar o ano pasado. Neste caso son 22 empresas as que optan á adxudicación. A obra está valorada en 98.000 euros. A pista terá unhas dimensións de 42×25 metros máis dous metros de seguridade. Marcaranse lonxitudinalmente unha pista de fútbol sala de medidas regulamentarias e, transversalmente, dúas pistas de baloncesto. Contará con iluminación e un valado perimetral de malla.
Por último, 9 empresas aspiran a resultar adxudicatarias na contratación do proxecto de mellora da estrada da parroquia de Montemaior que vai desde Santa Margarida á Silva. Consiste na completa renovación do firme desta vía, que é de gran importancia ao comunicar as fincas agrícolas desa zona coa estrada DP-2404 que dirixe á Silva (Concello de Cerceda) e dar tamén acceso ao termo municipal de Carballo por Paradela. O orzamento ascende a máis de 65.000 euros a cofinanciar entre o Concello e a Axencia Galega de Desenvolvemento Rural (Agader).
