Solicita que se aumente o periodo de concesión dos espazos dun ano para empresas, a un mínimo de dous anos prorrogables
A ordenanza reguladora do viveiro de empresas do Concello da Laracha foi aprobada inicialmente no pleno do pasado 25 de marzo. Tamén, publicada posteriormente no Boletin Oficial da Provincia, estando actualmente no periodo de exposición pública para a presentación de alegacións. «Desde o Bng da Laracha consideramos que o periodo dun ano prorrogable por un máximo de 12 meses máis, que a ordenanza establece para a ocupación dos espazos por parte das persoas emprendedoras, é insuficiente», explica Xoán Sande, portavoz municipal.
Por iso, engade que «desde o noso punto de vista un ano non é tempo suficiente para poñer en marcha unha actividade empresarial e poder consolidala. Entendemos que como mínimo o periodo de concesión debe ser de 2 anos prorrogables, en caso de non haber lista de agarda. Lembremos que o viveiro de empresas municipal está constituído por dúas naves duns 150 metros cadrados de superficie e 8 postos de `coworking´».
A maiores disto, os nacionalistas locais, solicitarán que se inclúa na ordenanza un prazo de resolución das solicitudes dun mes. «Xa que ao non contemplarse prazo ningún hai que aplicar o que fixa a Lei 39/2015 que é de 3 meses», finaliza Sande.
