Nos próximos días formalizaranse os contratos como último trámite previo ao inicio dos proxectos valorados en 640 mil euros
Na última sesión ordinaria da Xunta de Goberno Local foron adxudicados cinco proxectos de investimento en infraestruturas municipais valorados nun total de 640.000 euros. O máis novidoso é o de creación do parque de patinaxe «Skatepark» na capital municipal, pola parte posterior do IES Agra de Leborís.
Dito proxecto, que ten un orzamento de 155.000 euros, será executado por Zona de Obras O Rosal S.L. A actuación ten por finalidade ofrecer unha nova alternativa de ocio e deporte especialmente dirixida ao público adolescente e xuvenil. Disporá de diferentes tipos de planos inclinados e costas para ofrecer un amplo abano de posibilidades de movementos. Ademáis, estará equipada cunha fonte de auga potable e iluminación en báculos e proxectores simétricos LED. Para elo será preciso canalizacións dos servizos de abastecemento e electricidade, así como de recollida de pluviais.
Máis obras públicas
Os outros catro proxectos céntranse na mellora da rede viaria municipal e alcanzan un investimento conxunto de 483.000 euros. Dous deles foron adxudicados a Construcciones J. Mauri e Hijos S.L. O mesmo inclúe actuacións nas parroquias de:
- Golmar (núcleos de A Calvela e Requesende)
- Erboedo (núcleos de Cendón e Vilarmaior e accesos a O Vilar)
- Coiro (accesos a Longra e O Toural)
- Montemaior (núcleos de Cumiáns e A Fieira)
- Lestón (núcleo de A Porta Santa)
Por outra parte, a empresa Oviga resultou adxudicataria do proxecto de renovación do pavimento da estrada entre O Chamusco e Arén (parroquia de Cabovilaño) e do núcleo de Bocixa (Soandres).
Por último, Canarga Construcciones executará o proxecto de mellora da estrada da parroquia de Vilaño que presenta unha lonxitude de 2,7 quilómetros e comunica os lugares de A Ribela, Marfulo e A Piña.
A adxudicación da execución destes proxectos faise trala clasificación das ofertas presentadas polos licitadores realizada pola Mesa de Contratación. Nos próximos días serán formalizados os contratos como último trámite administrativo previo ao inicio das obras.
