A Xunta, a través da Consellería de Medio Ambiente, Territorio e Vivenda, achegará o 70% e o Concello da Laracha porá o 30% restante
A Xunta de Galicia acaba de adxudicar por algo máis de 107.000 euros, IVE incluído, o contrato para acometer varias actuacións de mellora na contorna do campo da feira de Paiosaco, no concello da Laracha.
En concreto, a intervención prevista, cun prazo de execución de catro meses, centrarase nas rúas Xosé Loureiro González, Xosé Neira Vilas e Álvaro Cunqueiro. Tamén, na praza Campo da Feira, localizadas en pleno núcleo urbano.
Os traballos a executar teñen como obxectivo crear uns espazos máis amables para os peóns, dotándoos de maior comodidade e seguridade grazas á ampliación das actuais beirarrúas. Tamén prevén acometer unha mellora da imaxe xeral da zona mediante a renovación do mobiliario urbano. Así mesmo, se farán as obras necesarias para dotar ás rúas Xosé Neira Vilas e Álvaro Cunqueiro dunha rede de pluviais.
Cómpre lembrar que esta actuación urbanística se executará grazas ao convenio de colaboración asinado o pasado mes de febreiro entre a conselleira de Medio Ambiente, Territorio e Vivenda, Ángeles Vázquez, e o rexedor, José Manuel López. Así, a Xunta achegará o 70% do custo das obras e o Goberno municipal, o 30% restante.
Plan Hurbe
Os traballos na contorna do campo da feira de Paiosaco, ademais, enmárcanse nos obxectivos do plan Hurbe, unha liña de apoio económico aos concellos impulsada pola Xunta hai xa 12 anos co fin de contribuír á mellora dos equipamentos municipais e dos servizos públicos, así como á humanización e posta en valor das contornas urbanas. Co mesmo fin, a Consellería ten reservados nos seus orzamentos deste ano unha partida de 7 millóns de euros para seguir apoiando este tipo de proxectos e iniciativas locais.
