O sábado, a saída será ás 13:00 horas e o remate do percorrido está previsto en torno ás 16:30
O Concello será protagonista na XIX edición da Volta Ciclista á provincia da Coruña. A proba, unha das citas máis importantes en categoría Elite-Sub23, comezará a disputarse mañá venres e constará de tres etapas. A segunda delas, a deste sábado, terá a saída e meta na capital municipal da Laracha.
Minutos antes das 13:00 horas está prevista a saída desde Avenida Doutor López Astray cara a Avenida Fisterra en dirección Lemaio. Tras un percorrido de 141 km pasando polos municipios de Carballo, Malpica de Bergantiños, Ponteceso, Coristanco e Cerceda, regresarán ao punto de partida pola estrada de Soandres. A chegada será entre as 16:21 e as 16:43 horas, pero dependerá da velocidade media da etapa.
Prohibido aparcar desde mañá
Debido á celebración da volta ciclista, o estacionamento de vehículos estará prohibido na Avenida Doutor López Astray desde as 18:00 horas de mañá venres e ata o remate da etapa o sábado pola tarde. Esta indicación estará sinalizada desde hoxe pola Policía Local. Ademais, esa mesma vía estará pechada á circulación o sábado desde antes da saída (12:45 horas) e da chegada (previsiblemente, en torno ás 16:00 horas). En ambos casos, ata o paso do último ciclista e dos vehículos dos equipos e da organización. Así mesmo, durante a etapa haberá alteracións puntuais do tráfico ao longo de todo o percorrido ao paso do pelotón.
