«Papar sen cancela» e «Os Bolechas» na Casa da Cultura con entrada gratuíta por orde de chegada
Hoxe no programa Venres Teatrais preséntase a comedia «Papar sen cancelas». A obra trae á Laracha a Isabel Risco, Pedro Brandariz e Fran Rei. Tres xeniais “chefs” que preparan menús para diferentes personaxes entre o máis distinguido do panorama galego actual. A situación sanitaria limita a asistencia de público ao cincuenta por cento do aforo da Casa da Cultura. A obras comezará ás 20:30 horas.
E mañá un evento dirixido ao público infantil presenta a «Os Bolechas», protagonistas da exitosa serie da Televisión de Galicia, que nesta ocasión chegan cunha nova aventura no Camiño de Santiago.
Os Bolechas e a Porta dos Camiños é un espectáculo teatral no que Carlos, Loli, Pili, Braulio, Sonia e Tatá coñecerán a Haker Mater, un programador informático que está poñendo a punto a Porta dos Camiños. Unha máquina que lles axuda a elixir un dos moitos Camiños de Santiago ás persoas que queren peregrinar e non saben por que vía facelo. O que pasa é que a máquina leva 11 anos sen funcionar e parece que precisa algúns arranxos. Coa axuda do público, Os Bolechas conseguirán arranxala e tamén aprenderán unha chea de cousas sobre as principais vías de peregrinación.
Os Bolechas actúan a partir das 17:30 horas na Casa da Cultura da Laracha con acceso gratuíto ata completar a capacidade máxima da sala, coa limitación dun único adulto acompañando a cada neno. O público deberá levar máscara durante toda a duración do evento.
Todas as funcións serán con entrada gratuíta por orde de chegada e ata completar o aforo máximo permitido. Colaboran co Concello da Laracha a Deputación da Coruña e a Xunta de Galicia -Secretaría Xeral de Política Lingüística-. Programa FalaRedes 2020 e do Fondo de proxectos culturais Xacobeo 2021.
Calendario do Venres Teatrais
- Venres 20: A comedia Papar sen cancelas traerá á Laracha a Isabel Risco, Pedro Brandariz e Fran Rei. Tres xeniais “chefs” que preparan menús para diferentes personaxes entre o máis distinguido do panorama galego actual.
- Día venres 27: Chola, a IT Girl Laura Valverde porá en escena á protagonista da peza. Unha mecánica de coches, blogueira e youtuber galega que é contratada por un teatro para presentar o seu monólogo ao máis puro estilo de show escénico youtuber.
- O pano dos Venres Teatrais pecharase o 4 de decembro con Soa. Un espectáculo protagonizado por unha muller maltratada física e psicoloxicamente á que dá vida a actriz Rogelia dos Outeiros. A peza, para maiores de 12 anos, está dirixida por Fran Rei. Inspirada no monólogo de Darío Fo La donna sola.
