O prazo de inscrición para os dous servizos municipais de axuda á conciliación da vida laboral e familiar permanecerá aberto ata o venres 26 de xuño
O Concello da Laracha abre hoxe as inscricións nos dous servizos municipais de axuda á conciliación da vida laboral e familiar. Estes, préstanse a través do Programa Harmoniza ás persoas que teñen ao seu cargo nenos de entre 3 e 12 anos de idade.
Así, o servizo de aula lúdica regresará o 1 de xullo e prestarase ata o inicio do curso escolar en horario de luns a venres de 9:00 a 14:00 horas. Cabe lembrar que a situación actual im
plica a necesidade de limitar o número de usuarios de acordo ás normas de seguridade establecidas polas autoridades sanitarias. Por iso, o acceso ao servizo será exclusivo para aquelas persoas que xustifiquen a necesidade de conciliación. É dicir que depende de a xornada laboral dos proxenitores e que non dispoñan de redes de apoio para o coidado dos nenos.
Programa Madrugadores
Por outra parte, tamén se abre a inscrición no programa Madrugadores para o alumnado dos CEIPs Otero Pedrayo da Laracha, Alfredo Brañas de Paiosaco e Caión no curso escolar 2020-2021. As instancias poderán presentarse durante un mes e medio xa que o prazo rematará o 31 de xullo.
A prestación do servizos vai ligada á actividade lectiva nos centros de ensino, polo que a súa posta en marcha coincidirá co inicio do curso escolar. Sempre e cando o permitan as autoridades sanitarias competentes.
Dende o Concello, lembran que Madrugadores ten como obxectivo responder ás necesidades das familias derivadas das dificultades que presentan para poder compatibilizar os seus horarios laborais cos escolares dos seus fillos. Isto posibilita a atención dos menores por persoal cualificado nos propios colexios antes do inicio das clases, desde as 7:00 horas. A normativa da aula lúdica e os modelos de inscrición en ambos servizos están dispoñibles na web municipal.
