As emendas socialistas aos orzamentos do Concello para 2022 inclúen propostas para a dinamización do comercio local e favorecer a participación veciñal
O Goberno municipal da Laracha levará a Pleno, o venres 7 de xaneiro, os orzamentos do Concello para 2022. Unhas contas que en opinión do Psoe da Laracha “non ofrecen respostas ás necesidades reais da veciñanza”. O grupo municipal socialista presentou unha serie de emendas parciais encamiñadas a reforzar o investimento en Medio Ambiente, Cultura e Educación, entre outras áreas. Proponse, por exemplo, a creación dunha liña de axudas para mellorar os puntos de recollida de plásticos nas explotacións agro-gandeiras. Tamén a introdución dunha nova partida destinada á limpeza de fincas abandonadas para a prevención de incendios forestais.
Ademáis, defende a necesidade de facer partícipe ao tecido social do proceso de elaboración das contas municipais. Por iso se inclúe, entre as emendas, a creación do programa piloto de orzamentos participativos “A Laracha Veciñal”. Outras propostas pasan por poñer en marcha un estudo diagnóstico da dinamización do comercio de proximidade e da hostalería.
Palomi Rodríguez Castiñeira, voceira do grupo, reclama “unha revisión a fondo” das contas municipais porque, engade que “non se contempla ningún proxecto transformador para A Laracha”.
Outras propostas
Outra das propostas recollidas no documento de emendas é a de ampliar o horario das Bibliotecas Municipais coa contratación dunha nova auxiliar. Tamén, duplicar o investimento previsto para a reparación e mantemento dos centros de educación infantil e primaria. Para que estas partidas teñan encaixe no actual nivel de ingresos do Concello, os socialista propón unha redución do gasto en apartados como a publicidade ou as retribucións dos órganos de goberno.
