A voceira de Psoe local, aposta polo reparto dos fondos Next Generation EU
Explica Palomi Rodríguez que «no ámbito municipal en moitos concellos estanse a crear departamentos específicos para canalizar a xestión do inxente orzamento que está a piques de chegar dende Europa. O fin é establecer as bases e as prioridades para concorrer as diferentes convocatorias para o reparto dos fondos Next Generation EU».
O Psoe da Laracha propón que o Concello conte con proxectos de calidade. Tamén, que concorra ás diferentes convocatorias con ideas consensuadas entre os
principais actores políticos, económicos e sociais. Por iso, desexa someter á consideración do Pleno de maio instar á creación dun grupo de traballo con representación de todos os grupos políticos.
«Por iso -engade- é preciso que o noso Concello non se quede atrás. Que logremos un gran acordo que implique ao Goberno municipal, aos partidos políticos e a outras administracións, así coma aos diferentes actores económicos e sociais. É vital deseñar unha folla de ruta que permita, co maior consenso posible, concorrer ás diferentes convocatorias. Pero tamén, coas maiores probabilidades de éxito e que nos permitan avanzar cara un concello verde, dixital e cohesionado».
