‘Diversiplás’ é un proxecto dirixido á recuperación e valorización de residuos plásticos derivados da actividade marisqueira e da pesca
O Concello da Laracha vén de sumarse como entidade colaboradora do proxecto ‘Diversiplás’. A iniciativa está impulsada pola asociación Íntegro, entidade sen ánimo de lucro que promove a integración das persoas con diversidade funcional desde hai 30 anos.
‘Diversiplás’ é un proxecto dirixido á recuperación e valorización de residuos plásticos derivados da actividade marisqueira e da pesca. Ten como protagonistas a diferentes axentes sociais da Costa da Morte. Conta co apoio do GALP Costa da Morte e o financiamento do Fondo Europeo Marítimo e de Pesca a través da Consellería do Mar da Xunta. Entre os seus obxectivos figuran promover a inclusión social das persoas con diversidade funcional preservando o medio natural da Costa da Morte. Ademáis, xera novas dinámicas colaborativas para a posta en marcha de proxectos de economía circular.
Contedores brancos
O alcalde, José Manuel López Varela, e os edís José Ramón Martínez e Rocío López, recibiron no Concello ao presidente -Alfonso López- e á directora -Noelia Barreira- de Íntegro. Na oportunidade cederon ao Concello dous contedores brancos que serán instalados na biblioteca municipal da Laracha e no centro sociocultural de Paiosaco. Tamén haberá un contedor idéntico na Confraría de Pescadores de Caión.
Aquelas persoas que desexen cooperar con ‘Diversiplás’ deben depositar neses recipientes os envases de plástico que conteñan os símbolos:
- 2 (polietileno de alta densidade)
- 5 (polipropileno)
- 6 (poliestireno)
- todos sen etiquetas e lavados con auga e xabón
En próximas datas Íntegro ten previsto levar a cabo accións informativas dirixidas especialmente ao público infantil para explicarlles polo miúdo o tipo de envases que poden ser empregados por ‘Diversiplás’ e animalos a colaborar con ese programa.
