Este programa ofrece a un máximo de oito mozos participar como persoal de apoio aos técnicos especializados nas diferentes actividades municipais
O Concello abriu o prazo de inscrición para que mozos de entre 16 e 30 anos de idade poidan solicitar a súa participación no programa de voluntariado xuvenil que se porá en marcha no municipio da Laracha. Conta co apoio da Consellería de Política Social da Xunta de Galicia a través da Dirección Xeral de Xuventude, Participación e Voluntariado.
O programa ofrece a un máximo de oito mozos participar como persoal de apoio aos técnicos especializados nas diferentes actividades municipais. Tanto de tipo cultural, social, educativo, deportivo, xuvenil, medioambiental e de promoción do benestar das persoas maiores e da igualdade de oportunidades entre homes e mulleres que se levarán a cabo nos próximos meses.
Os voluntarios recibirán a orientación, a formación e o apoio necesarios para o exercicio da súa actividade. Ao rematar a participación entregaráselles un certificado oficial que acreditará a súa colaboración e recoñecerá o seu valor social. Durante o desenvolvemento das xornadas tamén percibirán unha compensación económica diaria que cubrirá os gastos de manutención e transporte
O propósito final deste programa é fortalecer a aprendizaxe dos voluntarios e reforzar os seus valores solidarios. As persoas interesadas poden ampliar información e formalizar a súa inscrición no Concello da Laracha.
