A fase práctica do obradoiro de emprego tamén realizarase nas naves do edificio municipal existente no parque empresarial
Por causa da alerta sanitaria da Covid-19, o obradoiro de emprego A Laracha V que levaba realizándose desde o mes de novembro, tivo que paralizarse a mediados de marzo. Ante a nova normalidade en Galicia, os vinte alumnos traballadores e cinco persoas que forman o equipo directivo, docente e administrativo, regresarán á actividade o 1 de xullo.
Este programa dual de formación e emprego é organizado polo Concello co apoio económico da Xunta de Galicia. Os alumnos traballadores repártense en dúas especialidades, dez en cada unha delas. A de carpintería de madeira ten por actuación principal a reparación do paseo fluvial do río Anllóns. Que cobra unha maior relevancia tralos danos que a pasarela sufriu no pasado inverno por causa dos temporais en Galicia.
Do orzamento total de 863.000 euros do obradoiro, 302.000 euros destínanse á compra do material para levar a cabo a actuación no paseo fluvial. Así, reflicte o volume da obra prevista que tivo que paralizarse durante a primavera e que comezará a executarse coa volta da actividade.
Máis traballos
A outra especialidade, a de pintura industrial, xa actuou na Casa da Cultura e no edificio administrativo. Ao regreso, completaranse os traballos na Casa do Concello. A continuación, intervirán no centro sociocultural de Paiosaco, nas pistas polideportivas descubertas de O Vilar (Cabovilaño) e Cumiáns (Montemaior). E tamén, nos báculos da iluminación pública.
En ambas especialidades a formación teórica, que aínda non está rematada, impartirase nas instalacións do edificio administrativo da Laracha. A fase práctica, ademais de nos propios lugares de execución dos proxectos, realizarase nas naves do edificio municipal existente no parque empresarial.
