O proxecto contempla intervencións na cuberta, reparación de canalóns e pintado tanto no interior como no exterior do pavillón
Está en fase de execución unha intervención dirixida a mellorar o interior e o exterior do pavillón Municipal da Laracha. A iniciativa é froito do convenio de colaboración rubricado entre o Concello e a Secretaría Xeral para o Deporte da Xunta de Galicia.
A fase máis laboriosa do proxecto localízase na cuberta. Alí se están a substituír as placas do lucernario, ademais de aplicar unha protección con pintura para favorecer a conservación. Deste xeito evítase que algunhas zonas poidan verse afectadas polos temporais. Tamén están a ser cambiados os canalóns para favorecer a evacuación das augas pluviais. Así mesmo, contémplase o repintado das ménsulas de aceiro e dos muros exteriores e as paredes interiores do polideportivo.
O investimento alcanza os 40.000 euros, dos cales 25.000 euros son achegados pola Secretaría Xeral para o Deporte por medio dunha subvención nominativa. Os 15.000 euros restantes son asumidos polo Concello con fondos propios municipais.
