A actuación na parada de taxis da Laracha está valorada en 30.000 euros
Xa está en marcha a execución de proxecto dirixido a transformar a parada de taxis existente a carón da Praza do Concello. A actuación ten por finalidade mellorar a accesibilidade e adecuar ese espazo en beneficio dos peóns, condutores e profesionais do sector.
Actualmente o espazo conta con prazas de estacionamento en diagonal entre a zona de circulación e unha beirarrúa dun metro de amplitude. O proxecto contempla recolocar as prazas da parada de taxis para realizar o estacionamento en liña. Desde xeito gañase un espazo que permitirá ampliar a beirarrúa ata o dobre da anchura actual. Tamén aumentar o espazo de separación entre a zona de estacionamento e o ámbito de circulación. Ademais, crearase unha nova marquesiña xunto á parada en substitución das cabinas telefónicas para aumentar a comodidade dos usuarios e dos taxistas.
A actuación deseñada polo Concello da Laracha está valorada en preto de 30.000 euros e será financiada con fondos propios municipais. O alcalde, José Manuel López Varela, e o concelleiro Jesús Souto, reuníronse cun representante da empresa adxudicataria no propio lugar das obras.
