O proxecto de orzamentos foi sometido onte a ditame en comisión informativa e será elevado ao Pleno extraordinario que se celebrará o 7 de xaneiro
O grupo de goberno da Laracha presentou onte á Corporación municipal o proxecto de orzamentos para o ano 2022. O fixo na Comisión informativa permanente de Asuntos Económicos, Facenda e Especial de Contas para o seu debate, votación e, de ser o caso, aprobación, na sesión extraordinaria do Pleno do 7 de xaneiro.
O presuposto está equilibrado en gastos e ingresos e alcanza o importe de 8.618.000 euros, o que supón un incremento de 313.000 euros (3,77 %) con respecto ao exercicio anterior. Istoe é debido á maior participación nos ingresos do Estado e ao reforzamento nas achegas da Xunta de Galicia e da Deputación da Coruña para o financiamento de programas de servizos sociais e de investimentos. Un ano máis, o goberno local manterá a súa política de conxelación de taxas e impostos municipais.
Este proxecto volve poñer o seu centro no benestar da poboación e no esforzo investidor. As contas, ten en conta a realidade e as necesidades do Concello e dos seus habitantes. Tamén reflejan a conxuntura actual e o crecemento social e económico que está a rexistrar A Laracha.
Destino do orzamento
Como dato significativo, máis do 20 % dos orzamentos (1.775.000 euros) terán por destino a protección social. Neste apartado inclúense as achegas municipais para servizos públicos:
- escola infantil
- centro de día e fogar residencial
- centros sociais da terceira idade
- servizo de axuda no fogar
- programas de atención a dependentes
- colectivos con necesidades especiais
Tamén está contemplada nesta área o gasto que asumirá o Concello en materia de promoción do emprego. Lembramos que actualmente está en marcha tanto o obradoiro dual de emprego A Laracha VII como o programa integrado de emprego, ambos co apoio da Xunta de Galicia.
Ademais, blíndanse as consignacións orzamentarias en preto de 450 mil euros para facer fronte ás axudas relativas a:
- bolsas de estudos
- adquisición de equipamentos informáticos para o alumnado
- fondo de emerxencia social
- Plan de Transporte Metropolitano
No próximo exercicio económico volverase apostar por un alto volume de investimentos en infraestruturas públicas. Destinaranse 1.240.000 euros, o que supón preto do 15 % do total, para:
- Capítulo 6 (investimentos reais), no que se recollen os proxectos de mellora da rede viaria en todas as parroquias
- Capítulo 7 (transferencias de capital), que inclúe as achegas do Concello para o cofinanciamento coa Xunta de Galicia dos proxectos de construción da nova estación de tratamento de auga potable e de humanización de rúas no entorno do recinto feiral de Paiosaco.
O capítulo máis amplo é o relativo a gastos en bens correntes e servizos, que se sitúa próximo aos cinco millóns de euros e supón máis do 57 %. Sen embargo, minórase a súa importancia tanto absoluta como relativa con respecto ao exercicio anterior debido ás novas licitacións dos principais contratos de servizos municipais levadas a cabo en 2021. Neste capítulo tense en conta o incremento do prezo das fontes enerxéticas e consígnanse os créditos necesarios para avanzar na escavación arqueolóxica e posta en valor do Castro de Montes Claros e no proxecto de recuperación de topónimos nas parroquias, incluíndo tanto a numeración das vivendas como a dixital.
No apartado referido ao persoal, prevese o incremento máximo do 2 % das retribucións contemplado no proxecto de Lei de orzamentos xerais do Estado para 2022 e, tamén, a retribución da antigüidade do persoal laboral que está a ser obxecto de negociación coa representación sindical.
Estes presupostos serán a folla de ruta da acción do goberno local durante o ano 2022, que continuará caracterizándose por ofrecer a máxima cobertura en servizos e programas públicos para a cidadanía, así como pola mellora das infraestruturas e equipamentos con visión de presente e futuro e, ao mesmo tempo, mantendo o compromiso de non aumentar a presión fiscal á poboación larachesa.
