O concello da Laracha abre a oficina virtual tributaria que permite relizar 18 trámites en liña.
O Goberno local vén de poñer en funcionamento, na sede electrónica municipal, a Oficina Virtual Tributaria do Concello. Segundo fontes municipais «os obxectivo son prestar aos laracheses servizos de forma máis eficaz e continuar impulsando a administración sen papel que axiliza e simplifica os procedementos e as relacións entre os cidadáns e profesionais co Consistorio naqueles trámites relacionados co pagamento de taxas e impostos«.
Ademais a Oficina Virtual Tributaria foi deseñada para que o contribuínte localice a información do seu interese dun xeito áxil e intuitivo. Esta circunstancia favorece o entendemento do trámite que «desexamos levar a cabo e minimiza o risco de erros na súa xestión«, engaden.
Así, todos os procedementos dispoñibles de autoliquidación das taxas e impostos poden ser completados ao cento por cento en liña a través da pasarela de pago. Tamén se ofrece a posibilidade de obter o documento co código de pagamento para aboar posteriormente nunha entidade bancaria.
O catálogo dixital contempla un total de dezaoito trámites, entre os que se atopan os relacionados coas acometidas ás redes de saneamento e abastecemento; expedición de documentos administrativos (dereitos de exame, certificación catastral, contratos administraticos, etc); vaos; terrazas dos locais de hostalería; postos de venda no campo da feira de Paiosaco; licencias de apertura de establecementos; licencias urbanísticas; e recollida de lixo.
Tamén se permite o abono das actividades culturais e deportivas, así como da taxa pola utilización das instalacións deportivas municipais (pavillóns e pistas de pádel), aínda que nestes casos requírese formalizar previamente no Concello a correspondente inscrición ou reserva.
Por último, tamén poden realizarse simulacións sobre importe do imposto sobre construcións, instalacións e obras (ICIO) en relación ao custo do proxecto a executar.
Para acceder á Oficina Virtual Tributaria pinchar AQUÍ
