O Concello reforza a seguridade na confluencia da Avenida Fisterra coa rúa Silveiro Moreda
Para reforzar a seguridade viaria, o Concello da Laracha estableceu recentemente o sentido único de circulación na rúa Silverio Moreda do núcleo urbano da Laracha. Agora, o acceso permite é soamente pola Avenida Fisterra en dirección á Avenida de Caión, con saída xunto á igrexa parroquial. A actuación incluíu o ancheamento das beirarrúas, ademais de conservarse as prazas de estacionamento a ambas marxes.
Dado que dito proxecto afecta á confluencia dunha rúa municipal cunha estrada autonómica (Avenida Fisterra é o tramo urbano da AC-552), foi precisa unha autorización. Así, a Consellería de Infraestruturas e Mobilidade da Xunta de Galicia, requiriu a execución dunha actuación complementaria para facilitar o tránsito e reforzar a seguridade.
Dita intervención na Avenida Fisterra está a ser executada nestes momentos. Consiste na creación dun carril central de agarda para xirar á esquerda sen interromper o tráfico. Por outra banda, súmase o traslado do paso de peóns uns metros para situalo despois do cruce. Neste último caso, ademais do marcado do paso de cebra tamén foi preciso adaptar a beirarrúa e mover iluminación pública e sinalización vertical.
Local municipal da Insua
Na Xunta de Goberno Local celebrada recentemente acordou solicitar a cooperación económica da Consellería de Medio Ambiente, Territorio e Vivenda da Xunta de Galicia para o cofinanciamento do proxecto de mellora exterior do local municipal da Insua, Caión.
A intervención deseñada polo Concello da Laracha contempla a renovación das fachadas exteriores e está valorada nuns 25.000 euros. A solicitude de subvención faise ao abeiro da convocatoria de axudas do Instituto de Estudos do Territorio para actuacións de corrección de impactos paisaxísticos destinadas a concellos de Galicia.
Ademais, tamén se acordou solicitar a participación no programa de subvencións da Deputación da Coruña para o financiamento da contratación dun axente de igualdade. As súas funcións centraríanse na organización, planificación, intervención e realización de proxectos. Os mesmos, orientados a promoción da igualdade de oportunidades entre homes e mulleres e a prevención da violencia de xénero.
