As especialidades deste obradoiro son a atención sociosanitaria a persoas en institucións sociais e pintura industrial en construción
O Obradoiro de Emprego A Laracha VII terá unha duración de nove meses e constará de dúas especialidades: a de pintura industrial en construción e a de atención sociosanitaria a persoas en institucións sociais.
Foi presentado na Casa da Cultura nun acto copresidido polo alcalde, José Manuel López Varela, e a directora xeral de Formación e Colocación, Zeltia Lado. Asistiu unha ampla representación do grupo de goberno local e todo o persoal que formará parte deste novo programa dual.
Na oportunidade, o alcalde referiuse a este programa como “unha oportunidade extraordinaria para obter o certificado de profesionalidade en sectores con demanda de traballadores”, animando aos participantes a aproveitala “porque hai saída laboral”.
López Varela lembrou que os alumnos traballadores (dez por cada especialidade) estarán vinculados ao Concello cun contrato de formación. Ademais, acceden a unha remuneración económica durante os nove meses de duración do obradoiro e recibir o certificado de profesionalidade. Neste sentido, fixo referencia ao proceso selectivo realizado durante as últimas semanas, apuntando o dato de que se presentaran oitenta persoas para as vinte prazas dispoñibles.
Colaboración entre entidades
Tamén Zeltia Lado puxo en valor “a esencial colaboración entre as administracións públicas”, considerando que os obradoiros de emprego son “un modelo extraordinario de eficiencia e coordinación entre o Concello e a Xunta de Galicia”.
Para a directora xeral de Formación e Colocación, este programa “cambiará para mellor a vida” dos participantes e “contribuirá a ampliar a cualificación profesional, eficaz e especializada». Ambas especialidades, engadiu, «son sectores con demanda de emprego presente e futura”.
O orzamento da Xunta de Galicia para este tipo de programas é de 34 millóns de euros entre os 94 obradoiros de emprego que se levarán a cabo en toda a comunidade. Formarán dúas mil persoas.
O Obradoiro de Emprego A Laracha VII, o sétimo que organizará o Concello da Laracha, ten un orzamento de 345.000 euros. Será cofinanciado co apoio da Consellería de Emprego e Igualdade da Xunta de Galicia.
