Complementa e dá continuidade ao outro equipamento xa existente na mesma praza
O Concello abriu onte ao público para o seu uso o novo parque infantil creado na praza O Recreo. Está situado en pleno centro da vila da Laracha. O espazo conta con catro unidades de xogos -columpios, balancíns e xogos en torres con tobogán- pensados para o uso dos nenos máis cativos. Deste xeito da continuidade e complementa o outro paque xa existente desde hai anos. Todos os elementos dispoñibles estarán adaptados aos diferentes grupos de idade dos usuarios. A nova zona dispón, tamén, dun pavimento continuo de caucho para reforzar a seguridade dos nenos.
O Concello levou a cabo esta intervención dentro do plan municipal de ampliación, mellora e renovación de parques infantís para optimizar os espazos existentes. A praza está a carón da biblioteca municipal, da Casa da Cultura e do IES Agra de Leborís. Trátase dunha zona residencial que conta con varios locais comerciais e de hostalería nas súas inmediacións. O proxecto foi financiado integramente polo Concello da Laracha con fondos propios municipais.
