O novo local ocupará unha superficie útil de 24,20 metros cadrados e empregarase como sala de masaxe e fisioterapia
Desde o Concello da Laracha ten en fase de execución as obras dirixidas a crear un novo local no campo de fútbol municipal A Porta Santa de Paiosaco. A actuación desenvólvese dando continuidade ao edificio de vestiarios xa existente para xerar unha superficie útil de 24,20 metros cadrados. Será empregada como sala de masaxes e fisioterapia.
Así, aumentarase a cobertura en instalacións do campo de fútbol, que xa conta cun local social, sala de reunións e catro vestiarios para equipos e dous para árbitros. Tamén conta con lavandería e almacén, ademais das bancadas que na súa parte baixa tamén albergan outro amplo espazo de almacenamento de material.
Club con once categorías
Este proxecto lévase a cabo de acordo ás necesidades que presenta a Unión Deportiva Paiosaco. O club é o principal usuario das instalacións, nas que desenvolven os adestramentos e os partidos como local os equipos cos que conta a entidade en todas as súas categorías, once na temporada actual.
A actuación superará os 17.000 euros de investimento a financiar integramente con fondos propios municipais. O alcalde, José Manuel López Varela, e os concelleros de Obras e de Deportes, estiveron no campo de fútbol A Porta Santa para coñecer o desenvolvemento das actuacións.
