A nova vía prolonga a Avenida Manuel Fraga ata a Avenida López Astray
O Concello procedeu hoxe a abrir á circulación vía creada na Laracha. A arteria prolonga a Avenida Manuel Fraga pola parte posterior do IES Agra de Leborís e a comunica directamente coa Avenida Doutor López Astray a través da rúa Maruja Mallo.
A apertura ao tráfico faise unha vez concluída a execución do amplo proxecto de urbanización. Incluíu a pavimentación da nova estrada coa correspondente sinalización horizontal e vertical, a construción de beirarrúas y creación de espazo de aparcamento. Tamén, instalacións das redes de saneamento e abastecemento e a canalización soterrada dos servizos de rede eléctrica, telecomunicacións e iluminación pública.
Investíronse 245.000 euros neste proxecto, que forma parte do Plan especial de equipamentos educativos do Instituto. Ademais de crearse a nova vía, habilitouse un novo acceso para o transporte escolar.
Neste ámbito o Concello está a crear un punto de referencia para os veciños. Ademais da apertura e urbanización da nova vía, construirase unha segunda pista polideportiva descuberta e un parque de patinaxe.
Máis obras
O Concello tamén vén de concluír a execución dun amplo proxecto na parroquia de Cabovilaño. Trátase da ampliación da rede de saneamento e mellorar as condicións da estrada entre os núcleos de A Braña, A Fraga, A Cacharra e A Teixoeira.
Finalizou a intervención coa pavimentación con aglomerado asfáltico en quente da vía. Presenta unha lonxitude aproximada de oitocentos metros, incluíndo a ampliación da plataforma da calzada. Isto facilitará as comunicacións rodadas e reforzará a seguridade viaria na zona.
O alcalde, José Manuel López Varela, e o concelleiro de Urbanismo e Obras Públicas, Jesús Souto, mantiveron unha reunión co director da obra. O investimento total sitúase en torno aos 80.000 euros.
