Ante a nova situación de casos de Covid, o Concello suspende actividades culturais e pecha espazos públicos
Nova situación epidemiolóxica no Concello da Laracha. A Xunta de Galicia anuncia que desde esta media noite o concello pasará a formar parte do territorio do peche perimetral de Bergantiños. Entran en vigor medidas de prevención específicas, polo que hoxe celebrouse unha reunión da comisión municipal de seguimento ante a Covid-19 para analizar a situación actual.
En primeiro lugar informouse aos membros da existencia, a día de hoxe, de 39 casos activos con coronavirus no termo municipal da Laracha.
A continuación analizáronse as principais medidas restritivas que se publicarán esta tarde no Diario Oficial de Galicia e serán de obrigatorio cumprimento a partir das 00:00 horas. Cabe salientar o peche da hostalería e a limitación das reunións a persoas convivintes, xa sexa en espazos privados ou públicos. A Policía Local controlará o cumprimento destas normas. Reforza especialmente a súa presenza tanto nas estradas nos límites cos municipios de Arteixo e Cerceda como nos principais puntos de encontro do Concello.
Actividades e ocio
En relación á programación municipal de actividades, acordouse adiar as dúas funcións do programa Venres Teatrais previstas para os días 27 de novembro e 4 de decembro. Tampouco se levará a cabo a andaina polo entorno do río Acheiro programada para este domingo pola mañá. Si que se celebrará mañá sábado na Casa da Cultura a partir das 17:30 horas o espectáculo infantil Os Bolechas e a porta dos camiños. Cunha limitación de aforo de 30 persoas, polo que soamente se permitirá o acceso dun adulto acompañando a cada neno ou grupo de nenos convivintes.
Ademais, pecharanse as pistas de pádel municipais, todas as pistas polideportivas descubertas e o spa do complexo deportivo da piscina municipal. Seguindo instrucións do Servizo Galego de Saúde, acaba de acordarse tamén o peche dos parques infantís.
En relación á feira de Paiosaco, e dado que a próxima está prevista aínda para o 6 de decembro, os membros do comité acordaron aprazar a toma de decisións ao respecto segundo a evolución da situación durante os próximos quince días.
