Palomi Rodríguez defende “garantir a igualdade de oportunidades para que as mulleres teñan máis presenza na oferta cultural”
O Grupo Municipal Socialista da Laracha quere estender a celebración do Día Internacional das Mulleres máis aló do 8 de marzo. Por este motivo presentará, no próximo pleno, unha moción para poñer en marcha un programa anual de actividades. O obxetivo é promover a igualdade no eido da produción cultural. A portavoz municipal do Psoe local, Palomi Rodríguez Castiñeira, lembra que “o Concello debe tomar medidas non só para promover a produción cultural entre a veciñanza. Tamén, para garantir a presenza equilibrada de homes e mulleres na oferta cultural pública”.
A proposta de visibilidade contempla a creación dun ciclo de oito actividades gratuítas, unha no día 8 de cada mes, entre marzo e outubro de 2022. Incluiría diferentes disciplinas como teatro, literatura, pintura, escultura a arte ou o cinema, entre outras. Rodríguez Castiñeira indica que “lograriamos sacar á luz novos talentos con actividades moi diversas, equilibrando a presenza en todas as áreas ou manifestacións culturais”. A portavoz, anima ao goberno municipal da Laracha, ademais, a buscar a colaboración da Universidade da Coruña e outras institucións públicas para sacar adiante este proxecto.
Compromiso coa igualdade
Distintos estudos constataron, nos últimos anos, a escasa presenza das mulleres artistas en feiras e museos, a pesar de ser maioría, por exemplo, nas escolas de Belas Artes. Esta circunstancia ten o seu reflexo tamén en teatros, cines, concertos, festivais e demais espazos escénicos, onde a representación feminina segue a ser minoritaria.
“A exclusión da muller no relato artístico é un problema de base e require unha constante atención por parte do goberno municipal e do Concello no seu conxunto”, en opinión da concelleira. Ademais, defende que a posta en marcha do programa “sería un bo exemplo do traballo transversal dos distintos departamentos municipais e da inclusión da perspectiva de xénero nas súas decisións e proxectos”.
