O obxectivo da intervención na estrada é facilitar os accesos cara o CEIP Otero Pedrayo
A execución do proxecto de mellora da estrada que enlaza os núcleos de Bos Aires e O Pereiro avanza a bo ritmo. Esta completa intervención que está a executar a empresa Construcciones López Cao ten un orzamento de 243.000 euros e finánciase integramente con fondos municipais. O proxecto forma parte do Plan especial de equipamentos educativos do CEIP Otero Pedrayo. O mesmo facilitará os accesos ao colexio tanto de transporte escolar como de vehículos particulares e das persoas que acoden ao centro a pé. Tamén, mellorarase as comunicacións desde esa zona cara outros puntos próximos da parroquia de Vilaño como son o castro de Montes Claros ou a praza da Areosa, na que se sitúan a igrexa de Santiago e o centro sociocultural.
O proxecto prevé a ampliación da plataforma da calzada en seis metros máis. Nese espazo habilitaranse carrís para cada sentido de circulación, senda peonil e tamén, espazo de aparcamento nunha das marxes e arcén. En total a superficie afectada é de 8.140 metros cadrados. Así o puideron comprobar o alcalde, José Manuel López Varela, e o concelleiro de Obras Públicas, Jesús Souto visitando as obras.
A fase inicial das obras xa está completada tras realizarse movemento de terra e a explanación do terreo sobre o que se ampliará a calzada. Nestes momentos as obras céntranse na instalación das canalizacións soterradas dos diferentes servizos. Inclúe renovacións das tubaxes das redes de saneamento de augas residuais e recollida de pluviais. Tamén se comezou a realizar o acopio do material para a construción dos bordillos. Posteriormente realizarase a pavimentación e a correspondente sinalización horizontal e vertical para aumentar a seguridade viaria.
Máis actuacións
Cabe lembrar que ademais, o Concello ten proxectada outra ambiciosa actuación co dobre obxectivo de mellorar os accesos cara o CEIP Otero Pedrayo desde a estrada AC-552 a través rúa José Añón. Trátase de aumentar a superficie vinculada ao centro para albergar novos equipamentos deportivos e educativos que complementen aos existentes. Recentemente completouse o procedemento de expropiación dos 13.761 metros cadrados de superficie afectada, no que o Concello investiu máis de 82.000 euros.
