O Concello da Laracha financia integramente os proxectos con fondos municipais
O goberno municipal saca a licitación tres proxectos de mellora das infraestruturas públicas que suman un importe total de 484.000 euros. A financiación é integramente con fondos propios.
A actuación de maior orzamento -243.500 euros- consiste na ampliación da estrada entre Bos Aires e O Pereiro. Forma parte do Plan especial de equipamentos educativos do CEIP Otero Pedrayo. Está proxectado o ancheamento da plataforma da estrada para dispoñer de máis espazo para facilitar a circulación en ambos sentidos. Especialmente importante para os autobuses do transporte escolar. Tamén, inclúe habilitar prazas de estacionamento e crear unha senda peonil para reforzar a seguridade. Ao mesmo tempo que se licita o proxecto, continuarase avanzando no procedemento de expropiación dos terreos afectados no que o Concello inviste outros 44.000 euros.
Na capital municipal
Outro dos proxectos de mellora da rede viaria afectará á rúa Silverio Moreda da capital municipal. Enlaza dúas estradas vertebradoras das comunicacións rodadas como son a Avenida Fisterra (estrada AC-552) e a Avenida de Caión (estrada DP-1913). Actualmente está permitido o dobre sentido de circulación e existen tanto beirarrúas como zonas de aparcamento a ambas marxes. O Concello, consciente das dificultades que iso implica para o tránsito, establecerá o sentido único. O iniciativa que se levará a cabo está valorada en 85.500 euros. Contempla a ampliación das beirarrúas, melloras na iluminación pública e a completa sinalización en toda a rúa.
Tamén se sacará a licitación, en breve, o proxecto de construción do parque de skate no entorno do IES Agra de Leborís. Investiranse 155.000 euros na creación desta infraestrutura especialmente dirixida ao público xuvenil. O Concello está a converter este ámbito da capital municipal nunha nova área de referencia para a práctica deportiva, xa que ademais do parque de skate contará con dúas pistas polideportivas.
