Dentro da nova normalidade se atopa o apoio ao comercio, a conciliación persoal e laboral e reabrir as instalacións deportivas municipais da Laracha
Na sesión de hoxe da reunión da comisión municipal de seguimento do Covid-19, tomáronse unha serie de acordos encamiñados á nova normalidade. Céntranse no apoio ao sector comercial, a conciliación persoal e laboral das familias con nenos e reabrir as primeiras instalacións deportivas municipais.
Así, revisouse o borrador das bases que rexerán o plan de fomento do emprego promovido polo Concello da Laracha, dotado inicialmente con 220.000 euros. Incluirá axudas para autónomos e pequenas e medianas empresas prexudicadas pola crise sanitaria. O Concello dará traslado de dito documento aos grupos políticos da oposición. A próxima semana convocará unha xunta de portavoces para que poidan presentar as súas achegas. Será o paso previo á publicación das bases e á apertura do prazo para que as persoas e pemes que cumpran os requisitos poidan solicitar beneficiarse desta liña de subvencións municipais.
Por outra banda, no camiño a nova normalidade, acordouse fixar no mércores 1 de xullo a reapertura do complexo deportivo da piscina municipal da Laracha, incluíndo tanto a zona de auga como o ximnasio. Recentemente, o equipo de goberno mantivo unha reunión coa empresa concesionaria da xestión para consensuar esa data e establecer os protocolos de seguridade que deberá cumprir tanto o persoal ao cargo do complexo como os seus usuarios.
Conciliación persoal e laboral
Ademais, avanzouse que no mes de xullo tamén regresará o servizo de aula lúdica municipal co obxectivo de facilitar a conciliación persoal e laboral das persoas que teñen ao seu cargo nenos de entre 3 e 12 anos de idade. Tamén con ese mesmo propósito o Concello porá en marcha un programa municipal de actividades culturais e deportivas centrado en propostas para o público infantil e que se levará a cabo nos meses de xullo e agosto.
Por último, acordouse que a partir do martes 16 de xuño reincorporaranse ao seu posto de traballo de xeito presencial e diario os empregados municipais despois de varias semanas nas que se estableceran quendas de asistencia e teletraballo. A atención presencial no Concello seguirase facendo con cita previa ao número 981 605001, de luns a venres en horario de 9:00 a 14:00 horas.
