Aula Mentor ten un catálogo que permite ampliar as competencias profesionais e persoais e inclúe máis de douscentos cursos de diversas temáticas
O Concello ten en funcionamento no edificio administrativo da Laracha a Aula Mentor. Trátase do programa de formación en liña non regulada, flexible e con titorización persoal. A capacitación está promovida polo Ministerio de Educación e Formación Profesional.
Aula Mentor conta cun extenso catálogo de máis de douscentos cursos cos que ampliar as competencias tanto persoais como profesionais. Todos eles pódense facer en liña e nos horarios que cada usuario estime oportuno como alternativa á rixidez propia dos sistemas educativos convencionais. Para facilitalo, o Concello da Laracha pon a disposición, de xeito gratuíto, unha aula con equipamento informático situada no edificio administrativo. Alí, se poderá acudir para realizar os cursos de luns a venres en horario de 11:30 a 13:30 horas. En todos os casos cóntase cun titor especializado na materia e un administrador. Eles velarán polo correcto desenvolvemento dos cursos, orientando e axudando aos alumnos desde a matriculación ata o remate da formación.
Nos primeiros seis meses desde a posta en marcha do programa matriculáronse un total de trinta e seis persoas. Tres se presentaron á convocatoria de exames de febreiro e outras seis á de abril, resultando todas elas aptas. A próxima convocatoria será en xuño, e xa hai propostos para realizar os exames outros tres alumnos.
Validez dos cursos
Actualmente as persoas que aproban o exame de cada curso formativo reciben un certificado de aproveitamento outorgado polo Ministerio de Educación e Formación Profesional. Son, ademáis, susceptibles de ser presentados como méritos nos procedementos de selección de persoal das administracións públicas se así o establecesen as bases da convocatoria. Así mesmo, determinados cursos terán como recoñecemento o certificado de competencias profesionais nas oferta de Aula Mentor.
Na Laracha os cursos que contan con maior número de usuarios son os relacionados con contabilidade, informática, redes sociais para pemes, técnicas de estudo e lingua de signos. Outras áreas formativas dispoñibles céntranse nos sectores administrativo, agrario, comercial, electricidade, hostalaría, turismo, imaxe persoal, imaxe e son. Súmanse tamén, alimentación, sanidade, seguridade, mantemento, medio ambiente, servizos socioculturais, confección, vidro, cerámica e competencias lingüísticas.
As persoas interesadas poden anotarse presencialmente acudindo ao edificio administrativo da Laracha (Avenida Fisterra, 60), vía telefónica no 669 963094, a través da web https://aulamentor.alaracha.gal/ ou na páxina de Facebook de Aula Mentor da Laracha (https://www.facebook.com/aulamentordalaracha).
