O Concello percibirá 867.046,71 euros dos fondos para obras de investimento, gasto corrente e gastos sociais extraordinarios
A sesión ordinaria do Pleno deste mes, que se celebrará o próximo venres, terá como principal cuestión o destino dos fondos do Plan provincial de cooperación. A proposta é facelo en obras e servizos de competencia municipal (Plan Único Concellos) POS+2021. O asunto será sometido o martes ao correspondente ditame da Comisión Informativa.
Con cargo ao POS+ o Concello da Laracha percibirá un total de 867.046,71 euros divididos en tres achegas con diferentes finalidades. 329.535,06 euros –máis a aportación económica municipal- destinaranse a obras de investimento en infraestruturas municipais, Ademáis, 334.677,07 euros serán para gasto corrente e 202.834,58 euros corresponden ao POS+ Adicional para gastos sociais extraordinarios.
Actuacións de investimento
Así, o goberno local ten previsto financiar con cargo á achega as obras de investimento que céntranse na mellora da rede viaria municipal con actuacións contempladas en:
- Soandres: O Priorato, A Abeleira, Boimir, Insuaboa, Currelos de Abaixo, Condesuso, Condes, As Táboas e Ponte da Veiga.
- Montemaior: O Batalo, Bardenlos, A Ferreira, Casas Longas, O Lorteiro e Pazos.
- Cabovilaño: Cardois.
- Caión: Goxán.
- Coiro: A Painceira.
- Lendo: O Campo da Porta.
- Vilaño: Vilanova
Ademais, o Plan complementario, que ten natureza de reserva e a súa finalidade é poder investir os créditos procedentes no caso de que a Deputación da Coruña acordase unha maior achega para o POS+ ao longo do exercicio 2021, tamén quedaría definido. Ten un orzamento de 375.751,32 euros e inclúe actuacións nas parroquias de Vilaño (Ribela, Marfulo e A Piña), Lemaio (A Estrada, Tuixe de Arriba e Tuixe de Abaixo), Torás (A Barreira e O Campo), Erboedo (Cendón) e Golmar (Requesende e A Calvela).
POS+ Adicional
Como se detallou previamente, coa achega de 202.834,58 euros do POS+ Adicional financiaranse gastos sociais extraordinarios que asumirá o Concello ao longo deste ano. As catro áreas ás que o goberno local proporá destinar ditos fondos son a ampliación do servizo de axuda a domicilio en todas as súas modalidades. Tamén convocatorias de axudas ás familias para sufragar gastos que faciliten a escolarización dos nenos (incluíndo adquisición de material informático e acceso a medios dixitais). Ademáis, fondo do emerxencia social (destinadas a colectivos vulnerables) e reforzar o persoal municipal técnico e administrativo adscrito ao departamento de servizos sociais.
