O Martes de Entroido e o Día dos Milagres serán festivos no Concello da Laracha o ano proximo
A Corporación municipal acordou establecer no último Pleno ordinario que o Martes de Entroido (16 de febreiro) e o Día dos Milagres (8 de setembro) sexan festivos locais do Concello para 2021. Son as datas tradicionalmente escollidas por coincidir con celebracións de especial importancia no termo municipal.
Así mesmo, aprobouse por iniciativa do grupo do Partido Popular -coa abstención do grupo do Bng e os votos en contra dos concelleiros do grupo socialista- unha moción contra a modificación do regulamento xeral de Costas. Trátase das concesións nas zonas de dominio público marítimo-terrestre. O Concello instará ao Goberno central a deixar sen efecto a proposta de modificación dos prazos concesionais formulada no proxecto de Lei de Cambio Climático e Transición Enerxética. Tamén desistir nos trámites de modificar as condicións da ocupación que restrinxan a duración das prórrogas extraordinarias e a que rectifique o cambio interpretativo que está a aplicar na resolución das solicitudes de prórroga.
O alcalde, José Manuel López Varela, mostrou a súa preocupación pola situación, xa que podería ocasionar graves prexuízos a máis dun cento de empresas e outras actividades do complexo mar-industria, así como a milleiros de edificacións galegas asentadas no litoral.
Delito contra a seguridade viaria
A Policía Local da Laracha instruíu dilixencias por delito contra a seguridade viaria a unha condutora que triplicou a taxa de alcoholemia. Os feitos producíronse cando efectivos do corpo de seguridade municipal interceptaron ao vehículo no casco urbano da Laracha (Avenida Fisterra). A proba efectuada deu como resultado unha taxa de 0,80 miligramos por litro de aire expirado cando o máximo permitido é de 0,25.
